Abenduaren 13ko 15/1999 Lege Organikoa, Izaera Pertsonaleko Datuak Babesteari buruzkoa.

Lege organiko honen xedea da, datu pertsonalen tratamenduari dagokionez, pertsona fisikoen askatasun publikoak eta oinarrizko eskubideak bermatu eta babestea, eta, batez ere, norberaren zein familiaren ohorea eta intimitatea.

1. Lege organiko hau aplikatuko zaie euskarri fisikoan jasotako izaera pertsonaleko datuei, baldin eta euskarri horrek ahalbidetzen badu datu horiek tratatzea, bai eta sektore publiko zein pribatuak datu horien gainean gerogarrenean egin dezakeen erabilera-modalitate orori ere.

Lege organiko honek arautuko ditu izaera pertsonaleko datuen tratamendu guztiak:

a) Tratamendua Espainiako lurraldean egiten denean, tratamenduaren gaineko erantzukizuna duenaren establezimendu baten jarduera-esparruan.

b) Espainiako lurraldean establezimendurik ez izan arren, tratamenduaren gaineko erantzukizuna duenari Espainiako legeria aplikatu behar zaionean, nazioarteko zuzenbide publikoko arauak aplikatzeagatik.

c) Europar Batasuneko lurraldean establezimendurik ez izan arren, tratamenduaren gaineko erantzukizuna duenak datuak tratatzeko Espainiako lurraldean kokatutako bideak erabiltzen dituenean, salbu eta bide horiek igarobide-xedeekin bakarrik erabiltzen direnean.

2. Lege organiko honetan ezarritako izaera pertsonaleko datuen babes-araubidea ez zaie aplikatuko:

a) Pertsona fisikoek dituzten fitxategiei, pertsona horiek norberaren edo etxeko jarduerak bakarrik gauzatzen dituztenean.

b) Sailkatutako gaien gaineko arautegiaren mende dauden fitxategiei.

c) Terrorismoa eta antolatutako delinkuentziaren agerpen arriskutsuak ikertzeko ezarritako fitxategiei. Hala ere, halako kasuetan, fitxategiaren arduradunak aurretiaz komunikatuko dizkio Datuak Babesteko Agentziari fitxategi hori badela eta fitxategi horrek dituen ezaugarri orokorrak eta xedea.

3. Xedapen bereziek eta, hala denean, lege organiko honek modu berezian jasotako xedapenek arautuko dituzte hurrengo datu pertsonalen tratamenduak:

a) Hauteskunde-araubidearen legeriak araututako fitxategiak.

b) Estatistika-xedeetarako bakarrik balio dutenak, estatistika-funtzio publikoari buruzko estatuko zein autonomia-erkidegoetako legeriak babestutakoak badira.

c) Indar Armatuetako kideen Araubideari buruzko legeriak aipatu kalifikazioko txosten pertsonaletan jasotako datuak biltegiratzeko xedea dutenak.

d) Erregistro Zibiletik eta zigortu eta auzi-iheslarien Erregistro Zentraletik ateratakoak.

e) Segurtasun-indar eta -kidegoek erabilitako bideokameren bidez lortutako irudi eta soinuetatik ateratakoak, gai horretako legeriarekin bat etorriz.

Lege Organiko honen ondoreetarako, hurrengo hauei buruz ondoko hau ulertuko da:

a) Izaera pertsonaleko datuak: identifikatutako edo identifikatzeko moduko pertsona fisikoen gaineko edozein informazio.

b) Fitxategia: izaera pertsonaleko datuen inguruan antolatutako multzo oro, multzo hori sortu, biltegiratu, antolatu eta multzo horretara sartzeko modua edo modalitatea edozein dela ere.

c) Datuak tratatzea: automatizatutako edo automatizatu gabeko eragiketa eta prozedura teknikoak, komunikazio, kontsulta, interkonexio eta transferentzietatik ateratako datuak biltzea, grabatzea, gordetzea, prestatzea, eraldatzea, blokeatzea, ezereztea eta lagatzea ahalbidetzen dutenak.

d) Fitxategiaren edo tratamenduaren arduraduna: tratamenduaren helburu, eduki eta erabileraren gainean erabakiak hartzen dituen pertsona fisiko edo juridikoa, izaera publikoa zein pribatua duena, edo administrazio-organoa.

e) Ukitua edo interesduna: artikulu honen c) idatz-zatiak aipatu tratamenduaren objektu zein datu izan eta datu horien gaineko titulartasuna duen pertsona fisikoa.

f) Disoziazio-prozedura: datu pertsonalen tratamendu oro, baldin eta ezin badira uztartu lortutako informazioa eta identifikatutako edo identifikatzeko moduko pertsona.

g) Tratamendu-eragilea: tratamenduaren arduradunarentzat datu pertsonalak tratatzen dituen pertsona fisiko zein juridikoa, agintaritza publikoa, zerbitzua edo bakarrik nahiz beste batzuekin batera jardun dezakeen beste edozein erakunde.

h) Interesdunaren adostasuna: interesdunaren borondate-adierazpen aske, zalantzarik gabe, zehatz eta arrazoitua, bera ukitzen duten datu pertsonalak tratatzeko adostasuna emateko.

i) Datuak lagatzea edo komunikatzea: interesduna ez den beste pertsona bati datuen berri ematea.

j) Jendearen esku dauden iturriak: edozein pertsonak kontsulta ditzakeen fitxategiak, baldin eta arau murriztaileren batek hori eragozten ez badio, edo, hala denean, kontsulta egiteko betekizun bakar gisa ezarritako kontraprestazioa ordaintzen badu. Jendearen esku dauden iturri dira, soil-soilik, promozio-errolda, telefono-zerrendak, halakoen arautegi bereziak xedatutakoaren arabera, eta lanbide-taldeetara bildutako pertsonen zerrendak, baldin eta zerrenda horietan jasotzen diren datu bakarrak halako pertsonen izena, titulua, lanbidea, jarduera, ikasketa-maila, helbidea eta taldekide-izaeraren aipamena badira. Era berean, jendearen esku dauden iturri dira egunkari eta aldizkari ofizialak eta komunikabideak.

1. Izaera pertsonaleko datuak tratatzeko bil daitezke bakarrik, bai eta tratamendu horren mende jartzeko ere, datu horiek egoki eta bidezkoak izateaz gain, gehiegizkoak ez direnean, datu horiek zein esparrutan eta zein xederekin lortu eta halakoei begira. Gainera, esparru eta xedeak zehatzak, argiak eta legitimoak izan beharko dira.

2. Tratatu beharreko izaera pertsonaleko datuak zein xederekin bildu eta ezin izango dira erabili xede horrekin bateraezinak diren xedeetarako. Ez da bateraezina izango datu horien gainean gerogarrenean egin daitekeen tratamendua, xede historiko, estatistiko edo zientifikoekin.

3. Izaera pertsonaleko datuak zehatzak eta eguneratuak izango dira, ukituak une bakoitzean duen egoerarekin benetan bat etor daitezen.

4. Erregistratutako izaera pertsonaleko datuak zehaztugabeak badira, oso-osoan zein zati batean, edo osagabeak, datu horiek ezereztu eta, ofizioz, halakoen ordez kasuan kasuko datuak erregistratuko dira, zuzenduta edo osatuta, 16. artikuluak ukituei aitortutako ahalmenei kalterik egin gabe.

5. Izaera pertsonaleko datuak ezereztu egingo dira, jaso edo erregistratu ziren xederako beharrezko edo egoki ez direnean. Ez dira gordeko, interesduna nor den jakitea ahalbidetzeko moduan, datu horiek jaso edo erregistratzeko xedeak zein izan eta xede horiek betetzeko behar den denbora baino gehiago. Erregelamendu bidez zehaztuko da, legeria bereziaren arabera balio historiko, estatistiko edo zientifikoak aintzat hartuta, salbuespenez datu horiek oso-osoan gordetzea erabakitzeko prozedura.

6. Izaera pertsonaleko datuak biltegiratuko dira datu horietan sartzeko eskubidea ahalbidetuz, salbu eta datu horiek legearen arabera ezerezten direnean.

7. Debekatuta dago lege-iruzurrean, legearen aurka edo zilegi ez den moduan datuak biltzea.

1. Datu pertsonalak eskatzen zaizkien interesdunei aurretiaz eta esanbidez informazio zehatza eta zalantzarik gabea eman beharko zaie, ondoko hauen inguruan:

a) Izaera pertsonaleko datuen gaineko fitxategi edo tratamendua, bai eta datu horiek biltzeko xedea eta informazio horren jasotzaileak ere.

b) Egingo zaizkien galderei erantzutea nahitaezkoa edo borondatezkoa den.

c) Datuak lortzearen ondorioak edo datu horiek ez ematearen ondorioak.

d) Datuetan sartzeko, datuak zuzentzeko, datuak ezerezteko edo datuen aurka egiteko eskubideak egikaritzea.

e) Tratamenduaren arduradunaren identitatea eta helbidea edo, hala denean, arduradun horren ordezkariarenak.

Tratamenduaren arduradunak Europar Batasunean establezimedurik izan ez eta datuak tratatzean Espainiako lurraldean kokatutako bideak erabiltzen dituenean, ordezkari bat izendatu beharko du Espainian, salbu eta bide horiek igarobide-xedeekin erabiltzen direnean, tratamenduaren arduradunaren aurka jar daitezkeen akzioak gorabehera.

2. Datuak biltzeko galdera-sortak edo beste inprimaki batzuk erabiltzen badira, aurreko idatz-zatian aipatutako ohartarazpenak jasoko dira halakoetan, argiro irakurtzeko moduan jaso ere.

3. Ez da behar izango 1. idatz-zatiko b), c) eta d) letrek aipatu informazioa, eskatzen diren datu pertsonaletatik edo datu horiek jasotzen diren inguruabarretatik ondoriozta daitekeenean informazio horren edukia.

4. Izaera pertsonaleko datuak interesdunarengandik jaso ez direnean, fitxategiaren arduradunak edo horren ordezkariak esanbidez informazio zehatza eta zalantzarik gabea eman beharko dio interesdunari, datuak erregistratu eta hurrengo hiru hilabeteetan, tratamenduaren edukia, datuen jatorria eta artikulu honen 1. idatz-zatiko a), d) eta e) letretan jasotakoaren inguruan, salbu eta interesdunari aurretiaz eman zaionean horren gaineko informazioa.

5. Aurreko idatz-zatian xedatutakoa ez da aplikatuko, legeren batek esanbidez horixe ezartzen duenean, tratamenduak xede historiko, estatistiko edo zientifikoak dituenean, edo Datuak Babesteko Agentziaren zein horren pareko autonomia-erkidegoko erakundearen arabera ezinezkoa denean interesdunari informazioa ematea, edo neurriz kanpoko ahaleginak egin behar direnean, interesdunen kopurua, datuen antzinatasuna eta izan daitezkeen konpentsazio-neurriak kontuan hartuta.

Orobat, ez da aplikatuko aurreko idatz-zatian xedatutakoa, datuak jendearen esku dauden iturrietatik atera eta publizitate-jarduerarako zein merkatu-prospekziorako erabiltzen direnean. Halakoetan, interesdunari zuzendutako komunikazio bakoitzean datuen jatorriari eta tratamenduaren arduradunaren identitatearen zein interesdunak dituen eskubideen gaineko informazioa emango da.

1. Izaera pertsonaleko datuak tratatzeko, ukituaren zalantzarik gabeko adostatuna beharko da, salbu eta legeak beste zerbait xedatzen duenean.

2. Ukituaren adostasunik ez da behar izango izaera pertsonaleko datuak Administrazio Publikoek euren eskumenen esparruan dagozkien eginkizunak gauzatzeko biltzen direnean; datuak negozio-, lan- edo administrazio-harremanen kontratu edo aurrekontratuetako alderdiei buruzkoak izan eta harreman horiei eusteko zein halako harremanak betetzeko beharrezkoak direnean; datu-tratamenduaren xedea interesdunaren berebiziko interesen bat babestea denean, lege honen 7. artikuluko 6. idatz-zatiaren arabera; edo datuak jendearen esku dauden iturrietara bilduta egon eta datu horien tratamendua beharrezkoa denean fitxategiaren arduradunaren edo datuak komunikatzen zaizkion hirugarrenaren interes legitimoa betetzeko, betiere, interesdunaren oinarrizko eskubide eta askatasunak urratu gabe.

3. Artikulu honek aipatu adostasuna ezezta daiteke horretarako arrazoi justifikatua izan eta ezeztatze horrek atzeraeraginezko ondorerik ez duenean.

4. Izaera pertsonaleko datuak tratatzeko ez denean behar ukituaren adostasunik, eta legeren batek aurkakorik ezarri ezean, interesdunak datu horiek tratatzearen aurka egin dezake, egoera pertsonal baten inguruan arrazoi oinarritu eta legitimoak daudenean. Halakoetan, fitxategiaren arduradunak tratamendutik kanpo utziko ditu ukituaren inguruko datuak.

1. Konstituzioaren 16. artikuluko 2. idatz-zatian ezarritakoarekin bat etorriz, ezin izango da inor behartu bere ideologia, erlijio edo sinesmenei buruzko adierazpenak egitera.

Datu horiek direla eta, aurreko idatz-zatiak aipatu adostasuna eskatzen denean, interesdunari adostasun hori ez emateko duen eskubidea ohartaraziko zaio.

2. Ideologia, sindikatu-afiliazio, erlijio eta sinismenaren berri ematen duten izaera pertsonaleko datuak ukituaren esanbidezko eta idatzizko adostasunarekin bakarrik trata daitezke. Horren salbuespen dira politika-, filosofia-, erlijio- edo sindikatu-izaerako xedea duten alderdi politikoen, sindikatuen, konfesio edo erkidego erlijiosoen eta elkarteen, fundazioen nahiz irabazteko asmorik gabeko beste entitate batzuen fitxategiak, euren kideen inguruko datuei dagokienez; hala ere, datu horiek laga daitezen ukituak aurretiaz emandako adostasuna behar da beti.

3. Arrazari, osasunari eta sexu-bizitzari buruzko izaera pertsonaleko datuak bildu, tratatu eta laga daitezke, interes orokorreko arrazoiak direla bide, legeren batek halaxe xedatzen duenean edo ukituak esanbidez onartzen duenean hori.

4. Debekatuta daude ideologia, sindikatu-afiliazio, erlijio, sinesmen, arraza zein etnia, edota sexu-bizitzari buruzko izaera pertsonaleko datuak biltegiratzeko xedearekin sortutako fitxategiak.

5. Arau-hauste penal eta administratiboen inguruko izaera pertsonaleko datuak Administrazio Publiko eskudunen fitxategietan bakarrik jaso daitezke, kasuan kasuko arauetan ezarritako kasuetan.

6. Aurreko idatz-zatietan xedatutakoa gorabehera, artikulu honen 2 eta 3. idatz-zatiek aipatu izaera pertsonaleko datuak tratatzeko modukoak izan daitezke, datu horiek tratatzea beharrezkoa denean prebentziorako edo medikuaren diagnostikoarentzat, osasun-laguntza emateko edo tratamendu medikoentzat edo osasun-zerbitzuak kudeatzeko, baldin eta datu horiek tratatzen baditu lanbide-isiltasuna duen osasun-arloko profesional batek, edo lanbide-isiltasunaren pareko betebeharra duen beste pertsonaren batek.

Aurreko paragrafoak aipatzen dituen datuak tratatzeko modukoak izango dira, berebat, tratamendua beharrezkoa denean ukituaren edo beste pertsona baten berebiziko interesa babesteko, ukituak bere adostasuna emateko gaitasunik ez duenean arrazoi fisiko zein juridikoen ondorioz.

Lagapenaren inguruan 11. artikuluak xedatutakoa gorabehera, erakunde eta osasun-zentro publiko zein pribatuek eta kasuan kasuko profesionalek eurengana jotzen duten pertsonen edo eurek tratatu behar dituzten pertsonen osasunari buruzko izaera pertsonaleko datuak trata ditzakete, estatuko edo kasuan kasuko autonomia-erkidegoko osasunari buruzko legerian xedatutakoaren arabera.

1. Fitxategiaren arduradunak, eta, hala denean, tratamendu-eragileak, izaera pertsonsaleko datuen segurtasunaasuna bermatzeko eta baimenik gabe datu horiek aldatzea, galtzea, tratatzea edo horietan sartzea saihesteko beharrezko neurri teknikoak eta antolaketa-izaerakoak hartuko ditu, teknologia-egoera, biltegiratutako datuen izaera eta datu horiek dituzten arriskuak kontuan hartuta; arrisku horiek izan daitezke gizakiaren ekintzaren zein inguru fisiko edo naturalaren ondorio.

2. Izaera pertsonaleko datuak ez dira erregistratuko datuen osotasunari zein segurtasunari buruz eta tratamendu-zentro, lokal, ekipo, sistema eta programei buruz erregelamendu bidez ezarritako baldintzak betetzen ez dituzten fitxategietan.

3. Erregelamendu bidez ezarriko dira lege honen 7. artikuluak aipatu datuen tratamenduan parte hartzen duten fitxategiek eta pertsonek bete beharreko betekizunak eta baldintzak.

Fitxategiaren arduradunak eta izaera pertsonaleko datuen tratamenduaren edozein fasetan parte hartzen dutenek lanbide-sekretua izan behar dute nahitaez datu horien gainean, eta datu horiek gordetzeko eginbeharra ere izango dute. Betebehar horiek bere horretan iraungo dute, nahiz eta fitxategiaren titularrarekin edo, hala denean, arduradunarekin dituzten harremanak amaituta izan.

1. Tratamenduaren objektu diren izaera pertsonaleko datuak hirugarren bati komunika dakizkioke soil-soilik datu-lagatzailearen eta datu-hartzailearen eginkizun legitimoekin zuzeneko lotura duten xedeak betetzeko; interesdunak aurretiaz horren inguruko adostasuna eman beharko du.

2. Aurreko idatz-zatian ezarritako adostasuna ez da beharrezkoa izango:

a) Legeak baimentzen duenean lagapena.

b) Jendearen esku dauden iturrietatik jasotako datuak direnean.

c) Tratamendua askatasunez eta modu legitimoan onartutako harreman juridikoen ondorio izan eta harreman horiek garatzeko, betetzeko zein kontrolatzeko nahitaezkoa denean tratamendua hirugarrenen fitxategiekin konektatzea. Halako kasuetan, komunikazioa egitea zein xedek justifikatu eta xede hori betetzen duen heinean bakarrik izango da legitimoa.

d) Egin beharreko komunikazioaren jasotzailea herri-defentsaria, fiskaltza edo epaileak zein auzitegiak edo kontu-auzitegia direnean, halakoek dituzten eginkizunak gauzatzean. Modu berean, ez da behar izango adostasunik komunikazioaren jasotzailea herri-defentsariaren edo kontu-auzitegiaren antzeko eginkizunak dituzten autonomia-erkidegoetako erakundeak direnean.

e) Lagapena Administrazio Publikoen artean egin eta horren helburua gerogarrenean datuak tratatzea denean, xede historiko, estatistiko edo zientifikoekin.

f) Osasunari buruzko izaera pertsonaleko datuak lagatzea beharrezkoa denean, fitxategira jotzea eskatzen duen larrialdiari aurre egiteko edo ikerketa epidemiologikoak egiteko, estatuko zein autonomia-erkidegoetako osasunari buruzko legerian ezarritakoaren arabera.

3. Hirugarren bati izaera pertsonaleko datuak komunikatzeko adostasuna deuseza izango da, interesdunari ematen zaion informazioak ez duenean argi uzten baimendutako komunikaziora bildutako datuek zein xede izango duten edo datuak komunikatu nahi zaizkion subjektuak zein jarduera-mota duen.

4. Izaera pertsonaleko datuen komunikazioaren inguruko adostasuna, halaber, ezeztatzeko modukoa da.

5. Komunikazioa egon dagoenetik, izaera pertsonaleko datuak komunikatzen zaizkion subjektuak bere gain hartzen du lege honen xedapenak betetzeko betebeharra.

6. Komunikazioa egiten bada aurretiaz disoziazio-prozedura gauzatuta, ez da aplikatuko aurreko idatz-zatietan ezarritakoa.

1. Ez da datuen komunikaziotzat joko hirugarren bat datuetara sartzea, hori beharrezkoa denean tratamenduaren arduradunari zerbitzu bat emateko.

2. Kontratuan arautu beharko da hirugarrenen bidez tratamenduak egiteko aukera; kontratu hori idatziz jaso beharko da, edo kontratua egin dela eta kontratu horren edukia egiaztatzen duen beste edozein forma erabilita. Esanbidez ezarri beharko da tratamendu-eragileak tratamenduaren arduradunak emandako jarraibideen arabera bakarrik tratatuko dituela datuak, datu horiek ez dituela aplikatu edo erabiliko kontratu horretan jaso gabeko xedeekin eta datu horiek ez dizkiela komunikatuko beste pertsona batzuei, ezta datuok gordetzeko ere.

Kontratuan hizpatuko dira, berebat, lege honen 9. artikuluak aipatzen dituen segurtasun-neurriak. Tratamendu-eragileak nahitaez ezarri beharko ditu halakoak.

3. Behin kontratu-prestazioa beteta, izaera pertsonaleko datuak suntsitu edo tratamenduaren arduradunari itzuli beharko zaizkio. Beste horrenbeste egingo da edozelako euskarri edo agirirekin ere, halakoek tratamenduaren objektu izan den izaera pertsonaleko daturen bat jaso badute.

4. Tratamendu-eragileak datuak beste xede batekin erabiltzen baditu edo kontratuaren hizpaketak bete gabe komunikatu edo erabiltzen baditu, tratamendu-eragilea tratamenduaren arduradun gisa hartuko da, eta modu pertsonalean erantzungo du egin dituen arau-hausteen gainean.

1. Herritarrek eskubidea dute eurengan ondore juridikoak dituen edo eurak modu garrantzitsuan ukitzeko moduko ondore juridikoak dituen erabaki baten mende ez geratzeko, baldin eta erabaki hori soil-soilik oinarritzen bada herritarren nortasunaren alde batzuk ebaluatzeko erabili behar diren datuen tratamenduan.

2. Ukituak bere jokabidearen gaineko balorazioa jasotzen duten administrazio-egintzak edo erabaki pribatuak aurkara ditzake, baldin eta halakoen oinarri bakarra izaera pertsonaleko datuen tratamendua izan eta tratamendu horrek ukituaren ezaugarriak edo nortasuna definitzen baditu.

3. Kasu horretan, ukituak eskubidea izango du fitxategiaren arduradunak emandako informazioa jasotzeko. Informazio hori izango da ekintzaren oinarri den erabakia hartzeko tratamenduan erabilitako balorazio-irizpideen eta programaren gainekoa.

4. Datuen tratamenduan oinarritutako herritarren jokabidearen gaineko balorazioak froga-balioa izan dezake ukituak halaxe eskatzen duenean bakarrik.

Edozein pertsonak jakin dezake, horretarako Datuak Babesteko Erregistro Nagusitik kasuan kasuko informazioa jasota, izaera pertsonaleko datuen inguruko tratamendua dagoela, horren xedeak zein diren eta tratamenduaren arduradunaren identitatea zein den. Erregistro Nagusiaren kontsulta publikoa eta doakoa izango da.

1. Interesdunak tratamendupean egon eta izaera pertsonaleko diren bere datuei, datu horien jatorriari eta halakoen inguruan egin edo egingo diren komunikazioei buruzko informazioa eskatzeko eta doan lortzeko eskubidea izango du.

2. Informazioa datuak kontsultatuta lor daiteke, datu horiek bistaratuta, edo tratamenduaren objektu diren datuak idazki, kopia, telekopia edo fotokopia ziurtatu zein ziurtatu gabearen bidez zehaztuta, irakurtzeko eta ulertzeko moduan, gailu mekaniko bereziak behar dituzten klabe edo kodeak erabili gabe.

3. Artikulu honek aipatu datuetan sartzeko eskubidea hamabi hilabetetik beherakoak ez diren denbora-tarteetan bakarrik egikari daiteke, salbu eta interesdunak ondore horretarako interes legitimoa egiaztatzen duenean; azken kasu horretan, lehenago egikari ahal izango da eskubide hori.

1. Tratamenduaren arduradunak interesdunak duen zuzentze- edo ezerezte-eskubidea eragingarri egiteko betebeharra izango du, hamar eguneko epean.

2. Hala denean, izaera pertsonaleko datuak zuzendu edo ezereztu egingo dira, halakoen tratamendua ez datorrenean bat lege honetan ezarritakoarekin eta, bereziki, datu horiek zehaztugabeak edo osagabeak direnean.

3. Ezerezteak datuak blokeatuko ditu, eta datu horiek administrazio publikoen, epaileen eta auzitegien esku bakarrik gordeko dira, tratamenduak erator ditzakeen erantzukizunei aurre egiteko, erantzukizun horien preskripzio-epeak iraun bitartean. Aipatu epea igaro ostean, datuak suntsitu egin beharko dira.

4. Zuzendu edo ezereztutako datuak aurretiaz komunikatu badira, tratamenduaren arduradunak komunikazioa egin zaionari zuzenketa edo ezereztea jakinarazi beharko dio, baldin eta horrek tratramenduari eutsi badio; azken horrek ere datuak ezereztu egin beharko ditu.

5. Izaera pertsonaleko datuak gorde beharko dira aplikatu beharreko xedapenetan edo, hala denean, tratamenduaren gaineko ardura duen pertsona edo entitatearen eta interesdunaren arteko kontratu-harremanetan ezarritako epeetan.

1. Datuen aurka egiteko, datuetan sartzeko eta datuak zuzentzeko zein ezerezteko eskubidea egikaritzeko prozedurak erregelamendu bidez ezarriko dira.

2. Datuen aurka egiteko, datuetan sartzeko eta datuak zuzentzeko zein ezerezteko eskubidea egikaritzeagatik ez da kontraprestaziorik eskatuko.

1. Interesdunek Datuak Babesteko Agentzian erreklamazioak egin ditzakete, lege honetan xedatutakoaren aurkako jardunei begira, erregelamendu bidez ezarritako moduan.

2. Interesdunari oso-osoan edo zati batean, datuen aurka egiteko, datuetan sartzeko eta datuak zuzentzeko zein ezerezteko eskubideak egikaritzea ukatzen bazaio, interesdunak horren berri eman diezaioke Datuak Babesteko Agentziari edo, hala denean, autonomia-erkidegoko erakunde eskudunari; azken horiek ukatzea bidezkoa edo bidegabea den ziurtatu beharko dute.

3. Eskubideak babesteko esanbidezko ebazpena emateko gehieneko epea sei hilabetekoa izango da.

4. Datuak Babesteko Agentziaren ebazpenen aurka administrazioarekiko auzibide-errekurtsoa jar daiteke.

1. Tratamenduaren arduradunak edo eragileak lege honetan ezarritakoa ez betetzearen ondorioz, ondasunetan edo eskubideetan kalteak jasaten dituzten interesdunek kalte-ordainak jasotzeko eskubidea izango dute.

2. Titulartasun publikoko fitxategien kasuan, Administrazio Publikoen erantzukizun-araubideari buruzko legeriarekin bat etorriz eskatuko da erantzukizuna.

3. Titulartasun pribatuko fitxategien kasuan, akzioa jurisdikzio arrunteko organoetan egikarituko da.

1. “Estatuko Aldizkari Ofizialean” edo kasuan kasuko egunkari ofizialean argitaratutako xedapen orokorraren bidez bakarrik sortu, eraldatu edo ezaba daitezke Administrazio Publikoetako fitxategiak.

2. Fitxategiak sortzeko edo eraldatzeko xedapenak zehaztu beharko dute:

a) Fitxategiaren xedea eta erabilerak.

b) Zein pertsona edo kolektiborengandik lortu nahi diren izaera pertsonaleko datuak edo pertsona edo kolektibo horietatik nork eman behar dituen datuak nahitaez.

c) Izaera pertsonaleko datuak biltzeko prozedura.

d) Fitxategiaren oinarrizko egitura eta horretara bildutako izaera pertsonaleko datu-moten deskripzioa.

e) Izaera pertsonaleko datuen lagapena eta, hala denean, hirugarren herrialdeetara egin daitezkeen transferentziak.

f) Fitxategiaren arduradun izango diren Administrazioen organoak.

g) Datuetan sartzeko, datuak zuzentzeko zein ezerezteko eta datuen aurka egiteko eskubideak zein zerbitzu edo unitatetan egikari daitezkeen.

h) Segurtasun-neurriak, halakoak oinarrizkoak, maila ertainekoak edo goi-mailakoak izan behar diren zehaztuta.

3. Fitxategiak ezabatzeko ematen diren xedapenetan fitxategi horien destinoa ezarriko da edo, hala denean, fitxategi hori suntsitzeko hartutako neurriak.

1. Administrazio Publikoek euren eginkizunak betetzeko bildu edo prestatutako izaera pertsonaleko datuak ez zaizkie komunikatuko beste Administrazio Publiko batzuei, eskumen desberdinak edo gai desberdinei buruzko eskumenak egikaritzeko, salbu eta fitxategia eratzeko xedapenek edo komunikazio horren erabilera arautzen duen lerrun handiagoko xedapenek agindu dutenean komunikazio hori, edo komunikazioaren helburua denean datuak gerogarrenean xede historiko, estatistiko edo zientifikoekin tratatzea.

2. Edozein kasutan ere, komunikazioaren objektu izan daitezke Administrazio Publiko batek beste batentzat lortu edo prestatutako izaera pertsonaleko datuak.

3. Lege honen 11.2.b) artikuluan ezarritakoa gorabehera, jendearen esku dauden iturrietatik bildutako datuak ezin izango zaizkie komunikatu titulartasun pribatuko fitxategiei, interesdunak horretarako adostasuna ematen duenean izan ezik edo legeren batek beste zerbait ezartzen duenean izan ezik.

4. Artikulu honen 1 eta 2. idatz-zatietan ezarritako kasuetan, ez da beharrezkoa izango lege honen 11. artikuluak aipatu ukituaren adostasuna.

1. Segurtasun-indar eta -kidegoek eratutako fitxategiak lege honek ezarri araubide orokorraren mende izango dira, izaera pertsonaleko datuak administrazio-xedeetarako jaso badituzte eta, ondorenez, datu horiek erregistro iraunkorra izan behar badute.

2. Pertsona ukituen adostasunik gabe, segurtasun-indar eta -kidegoek polizia-xedeetarako bildu eta tratatutako izaera pertsonaleko datuek erabilera mugatua izango dute, segurtasun publikoarentzat benetako arriskua prebenitzeko edo arau-hauste penalak zigortzeko beharrezkoak diren datuen inguruko kasu eta kategoriei begira. Halako datuak ondore horietarako ezarri fitxategi berezietan biltegiratu beharko dira, eta fitxategiak kategorietan sailkatu beharko dira, fidagarritasun-mailaren arabera.

3. Segurtasun-indar eta -kidegoek 7. artikuluko 2 eta 3. idatz-zatiek aipatu datuak bildu eta trata ditzakete, halakoak ikerketa jakin baten xedeetarako guztiz beharrezkoak direnean bakarrik, eta jurisdikzio-organoek administrazio-jardunaren legezkotasun-kontrolaren gainean edo, hala denean, interesdunek aurkeztutako uzien gainean ebazpena emateko duten betebeharrari kalterik egin gabe.

4. Polizia-xedeekin erregistratutako izaera pertsonaleko datuak ezereztu egingo dira, datu horiek beharrezkoak ez direnean halakoak biltegiratzea arrazoitu zuten ikerketak egiteko. Ondore horietarako, kontuan hartuko dira, bereziki, ukituaren adina eta biltegiratutako datuen izaera, ikerketa edo prozedura zehatza amaitu arte datuei eusteko beharrizana, ebazpen judizial irmoa, bereziki absolutorioa bada, indultua, errehabilitazioa eta erantzukizuna preskribatzea.

1. Aurreko artikuluko 2, 3 eta 4 idatz-zatiek aipatu datuak jaso dituzten fitxategien arduradunek datuetan sartzea, datuak zuzentzea edo datuak ezereztea uka dezakete, estatua edo segurtasun publikoa defendatzeko, hirugarrenen eskubide eta askatasunak babesteko edo gauzatzen ari diren ikerketen beharrizanetarako arriskuak aintzat hartuta.

2. Herri Ogasuneko fitxategien arduradunek uka dezakete, orobat, aurreko idatz-zatiak aipatu eskubideak egikaritzea, eskubide horiek egikarituta tributu-betebeharrak betetzea ziurtatzeko administrazio-jardunak oztopatzen direnean, eta ukitua ikuskatzailetza-jardunen mende dagoenean beti.

3. Aurreko idatz-zatietan aipatu eskubideak egikaritzea ukatzen zaion ukituak Datuak Babesteko Agentziaren zuzendariari eman diezaioke horren berri edota autonomia-erkidego bakoitzeko erakunde eskudunaren zuzendariari, baldin eta fitxategiak autonomia-erkidego horietako polizia-kidegoek edo tributu-administrazioek badituzte. Zuzendari horiek ukatzea bidezkoa edo bidegabea den ziurtatu beharko dute.

1. Lege honen 5. artikuluko 1 eta 2. idatz-zatietan xedatutakoa ez zaio aplikatuko datuak biltzeari, ukituari infomazioa emateak Administrazio Publikoen kontrol- eta egiaztatze-eginkizunak modu larrian eragotzi edo zailtzen dituenean, edo defentsa nazionalari, segurtasun publikoari edo arau-hauste penalen zein administratiboen jazarpenari kalte egiten dionean.

2. Lege honen 15. artikuluan eta 16. artikuluko 1. idatz-zatian ezarritakoa ez da aplikatuko, baldin eta, kasuan kasuko interesak haztatuta, ondorioztatzen bada manu horiek ukituari eratxiki dizkioten eskubideak galdu egin behar direla, interes publikoko arrazoien ondorioz edo babes gehiago merezi duten hirugarrenen interesen ondorioz. Fitxategiaren administrazio-organo arduradunak idatz-zati honetan ezarritakoa aipatzen badu, arrazoitutako ebazpena emango du, eta ukituari berez duen eskubidea azalduko dio, Datuak Babesteko Agentziaren zuzendariari edo, hala denean, autonomia-erkidegoetako pareko organoaren zuzendariari ezetzaren berri ema diezaion.

1. Izaera pertsonaleko datuak jasotzen dituzten titulartasun pribatuko fitxategiak sor daitezke, euren titularra den pertsona, enpresa edo entitatearen jarduera edo xede legitimoak lortzeko beharrezkoa denean eta lege honek pertsonak babesteko ezarri bermeak errespetatzen direnean.

1. Izaera pertsonaleko datuen fitxategiak eratzen dituen pertsona edo entitate orok aurretiaz horren gaineko jakinarazpena egingo dio Datuak Babesteko Agentziari.

2. Erregelamendu bidez zehatz-mehatz arautuko dira jakinarazpenak jaso beharreko aldeak. Halakoen artean nahitaez jasoko dira fitxategiaren arduraduna, fitxategiaren xedea, fitxategiaren kokalekua, izaera pertsonaleko datuak zein motatakoak diren, segurtasun-neurriak, halakoak oinarrizkoak, maila ertainekoak edo goi-mailakoak diren zehaztuta, eta ustez lagako diren izaera pertsonaleko datuak eta, hala denean, ustez hirugarren herrialdeetara transferituko diren datuak.

3. Datuak Babesteko Agentziari komunikatu beharko zaizkio automatizatutako fitxategiak izan ditzakeen aldaketak, xedeari, arduradunari eta kokalekuaren helbideari dagokienez.

4. Datuak Babesteko Erregistro Nagusiak fitxategia inskribatuko du, baldin eta jakinarazpena ezarritako betekizunekin bat badator. Bat etorri ezean, Erregistro Nagusiak eska dezake falta diren datuak osatzea edo datuak zuzentzea.

5. Inskripzio-eskabidea aurkeztu eta hilabete igaro ondoren Datuak Babesteko Erregistro Nagusiak ez badu ebazpenik eman, automatizatutako fitxategia inskribatuta dagoela ulertuko da ondore guztietarako.

1. Datuak lehendabiziko aldiz lagatzen direnean, fitxategiaren arduradunak horren berri eman beharko die ukituei. Halaber, ukituei zehaztuko die fitxategiaren xedea, laga diren datuen izaera eta lagapen-hartzailearen izena eta helbidea.

2. Ez da izango aurreko idatz-zatian ezarritako betebeharrik 11. artikuluko 2. idatz-zatiko c), d) eta e) letretan eta 6. idatz-zatian ezarritako kasuetan, ezta lagapena legeak agintzen duenean ere.

1. Lege honen 3.j) artikuluak aipatu promozio-erroldan edo lanbide-taldeetara bildutako pertsonen zerrendetan dauden datu pertsonalak izan beharko dira soil-soilik zerrenda bakoitzaren xedea betetzeko beste. Iturri horiek gordetzeko ardura duten entitateek datu gehiago sartu ahal izateko interesdunaren adostasuna beharko dute; gainera, adostasun hori edozein unetan ezezta daiteke.

2. Interesdunek eskubidea izango dute lanbide-elkargoetako zerrendak gordetzeko ardura duen entitateak doan adierazteko euren datu pertsonalak ezin direla erabili publizitate-xedeekin edo merkatu-prospekziorako. Interesdunek eskubidea izango dute iturri horien ardura duten entitateen ondorioz promozio-erroldan jasotako datu pertsonal guztiak kentzea doan eskatzeko. Alferrikako informazioa kentzeko edo datuak publizitatean edo urrutiko salmentan erabiltzea eragozteko eskabidea egin beharko da hamar eguneko epean, kontsulta edo komunikazio telematikoen bidez ematen diren informazioei dagokienez, eta zerrendaren hurrengo edizioan, zerrenda hori editatzeko erabilitako euskarria edozelakoa izanda ere.

3. Jendearen esku dauden iturriak liburuan edo beste euskarri fisikoren batean editatzen badira, jendearen esku dauden iturriaren izaera galduko dute argitaratutako edizio berriarekin. Modu telematikoan lortzen bada formatu elektronikoan dagoen zerrendaren kopia bat, zerrenda horrek urtebetean galduko du jendearen esku dagoen iturriaren izaera, zerrenda hori lortzen den unetik zenbatzen hasita.

4. Jendearen esku dauden telekomunikazioen zerbitzu-gidetan jasotako datuek arautegi berezia izango dute.

1. Ondare-kaudimenari eta kredituari buruzko informazio-zerbitzuak ematen dituztenek ondore horietarako jendearen esku dagoen erregistro eta iturrietatik lortutako datuak edo interesdunak emandako informazioarekin zein interesdunaren adostasunarekin lortutako datuak bakarrik trata ditzakete.

2. Diruzko betebeharrak betetzearen edo ez betetzearen inguruan hartzekodunak edo haren izenean zein interesean jarduten duenak emandako izaera pertsonaleko datuak ere trata daitezke. Halakoetan, euren fitxategietan izaera pertsonaleko datuak erregistratu eta interesdun direnei, datuak erregistratu eta hogeita hamar eguneko epean, sartutako datuen erreferentzia jakinarazi eta datu guztien gaineko informazioa jasotzeko duten eskubidearen berri emango zaie, lege honek ezarritakoaren arabera.

3. Aurreko bi idatz-zatiek aipatu kasuetan, interesdunak halaxe eskatzen duenean, tratamenduaren arduradunak datuak komunikatuko dizkio interesdunari, bai eta tratamenduaren inguruan azken sei hilabeteetan komunikatu diren ebaluazio eta balorazioak ere. Halaber, datuak zein pertsona edo entitateri eman eta horien izena eta helbidea komunikatuko dizkio.

4. Interesdunen ekonomia-kaudimenaren inguruan erabakitzeko oinarrizko diren izaera pertsonaleko datuak bakarrik erregistratu eta laga daitezke. Horrez gain, datu horiek ezin dira izan sei urtetik gorakoak, mesedegarri ez direnean. Edozein kasutan ere, datu horiek egiazkoak izan behar dira interesdunen egoerari dagokionez.

1. Helbideak jaso, agiriak banatu, publizitatea egin, urrutiko salmenta, merkatu-prospekzioa eta antzeko beste jarduera batzuk dituztenak, izenak eta helbideak edo izaera pertsonaleko beste datu batzuk erabiliko dituzte, halakoak jendearen esku dauden iturrietan jasotzen direnean edo halakoak interesdunek eman dituztenean edo interesdunen adostasunarekin lortu direnean.

2. Datuak jendearen esku dauden iturrietatik ateratzen direnean, lege honen 5.5 artikuluko bigarren lerrokadan ezarritakoarekin bat etorriz, interesdunari zuzendutako komunikazio bakoitzean datuen jatorriari eta tratamenduaren arduradunaren identitateari buruzko informazioa emango da, bai eta interesdunak dituen eskubideen gaineko informazioa ere.

3. Datuetan sartzeko eskubidea egikaritzean, interesdunek euren izaera pertsonaleko datuen jatorria zein den jakiteko eskubidea izango dute, bai eta 15. artikuluak aipatzen duen osterantzeko informazioaren jatorria ere.

4. Interesdunek, aurretiaz eskabidea eginez eta gasturik gabe, euren inguruko tratamenduaren aurka egiteko eskubidea izango dute. Aurka eginez gero, tratamenduan baja emango zaie, eta, hala eskatuz gero, euren inguruan jasotako informazioak ezereztu egingo dira.

1. Modu iraunkorrean zein aldi baterako helbideak jaso, agiriak banatu, publizitatea egin, urrutiko salmenta, merkatu-prospekzioa eta antzeko beste jarduera batzuk egin nahi dituztenek, Estatistikako Institutu Nazionalari edo autonomia-erkidegoetako pareko organoei eska diezaiekete promozio-erroldaren kopia bat, hauteskunde-erroldan jasotako izen, abizen eta bizilekuaren inguruko datuekin osatuko dena.

2. Promozio-erroldako zerrenda bakoitzaren erabilerak urtebeteko indarraldia izango du. Behin epe hori igarota, zerrendak galdu egingo du jendearen esku dagoen iturriaren izaera.

3. Interesdunek promozio-erroldan ez agertzeko eskabidea egin ahal izateko prozedurak erregelamendu bidez arautuko dira. Prozedura horiek doakoak izango dira interesdunentzat eta horien artean erroldatze-agiria jasoko da. Hiru hilerik behin promozio-erroldaren zerrenda eguneratua editatuko da, hala eskatu dutenen izenak eta bizilekuak kenduz.

4. Kontraprestazioa eska daiteke aipatu zerrenda euskarri informatikoan emateagatik.

1. Sektoreko akordio, administrazio-hitzarmen edo enpresako erabakien bidez, titulartasun publiko zein pribatuko tratamenduen arduradunek eta horiek biltzen dituzten erakundeek kode-ereduak egin ditzakete. Kode-eredu horiek ezarriko dituzte antolaketa-baldintzak, jardunbide-araubidea, aplikatu beharreko prozedurak, inguruaren segurtasunari buruzko arauak, programa edo ekipoak, tratamenduan parte hartzen dutenen betebeharrak, informazio pertsonalaren erabilera, bai eta, euren esparruan, pertsonen eskubideak egikaritzeko bermeak ere, lege honek eta lege hau garatzen duten arauek jaso printzipio eta xedapenak erabat errespetatuta.

2. Aipatutako kodeek sistema bakoitzaren inguruan eragiketak egiteko erregela zehatzak eta estandar tekniko aplikagarriak jaso ditzakete. Erregela edo estandar horiek zuzenean ez badira kodera biltzen, halakoak ezartzen dituzten jarraibide edo aginduek kodean jasotako printzipioak errespetatu beharko dituzte.

3. Kode-ereduek kode deontologikoen edo lanbide-eginera egokiaren izaera izango dute, eta Datuak Babesteko Erregistro Nagusian eta, hala denean, autonomia-erkidegoek ondore horietarako sortutako erregistroetan gordailutu edo inskribatuko dira, 41. artikuluarekin bat etorriz. Datuak Babesteko Erregistro Nagusiak inskripzioa uka dezake uste duenean hori ez datorrela bat gai horren inguruko lege- eta erregelamendu-xedapenekin. Halakoetan, Datuak Babesteko Agentziako zuzendariak eskatzaileei kasuan kasuko zuzenketak egitea eskatuko die.

1. Ezin izango dira izaera pertsonaleko datuen behin-behineko zein behin betiko transferentziak egin, datu horiek tratatu edo tratatzeko bildu eta lege honek besteko babesik eskaintzen ez duten herrialdeetara bidaltzeko direnean. Datuak bidaltzeko, lege honetan ezarritakoa betetzeaz gain, Datuak Babesteko Agentziako zuzendariaren aurretiazko baimena lortu behar da; zuzendariak baimena eman dezake berme egokiak lortzen badira bakarrik.

2. Herrialde jasotzaileak duen babes-mailaren egokitasuna Datuak Babesteko Agentziak aztertuko du, datuen transferentzian edo transferentzia-kategorian dauden inguruabar guztiak aintzat hartuta. Bereziki, aintzat hartuko dira xede jakin baterako datuen izaera eta aurrez ikusitako tratamenduaren edo tratamenduen iraupena, datuak bidaltzen dituen herrialdea eta datuak jasotzen dituena, hirugarren estatuan indarrean dauden zuzenbideko arauak, orokorrak zein sektorekoak, Europar Batasuneko Batzordearen txostenen edukia eta herrialde horietan indarrean dauden lanbide-arauak zein segurtasun-neurriak.

Aurreko artikuluan ezarritakoa ez da aplikatuko:

a) Izaera pertsonaleko datuen nazioarteko transferentzia Espania alderdi den tratatu edo hitzarmenak aplikatzearen ondorio denean.

b) Transferentzia nazioarteko laguntza judiziala emateko edo eskatzeko egiten denean.

c) Transferentzia beharrezkoa denean prebentzio edo diagnostiko medikoentzat, osasun-laguntza edo tratamendu medikoak emateko zein osasun-zerbitzuak kudeatzeko.

d) Diru-transferentziak egin behar direnean, halakoentzat ezarritako legeria bereziarekin bat etorrita.

e) Ukituak zalantzarik gabeko adostasuna eman duenean transferentziaren inguruan.

f) Transferentzia beharrezkoa denean ukituaren eta fitxategiaren arduradunaren arteko kontratu bat betearazteko edo ukituak hala eskatuta kontratua egin aurretik neurriak hartzeko.

g) Transferentzia beharrezkoa denean, kontratua egiteko zein egin den edo egiteko dagoen kontratua betearazteko, betiere fitxategiaren arduradunak eta hirugarren batek egiten dutela hori, ukituaren mesederako.

h) Transferentzia beharrezkoa denean edo legeak hori ezarri duenean interes publiko bat babesteko. Transferentziak izaera hori izango du zerga- edo aduana-administrazio batek eskatu duenean, bere eskumenak betetzeko.

i) Transferentzia beharrezkoa denean prozesu judizial batean eskubide bat aitortu, egikaritu edo defendatzeko.

j) Transferentzia erregistro publiko batetik egiten denean, interes legitimoa duen pertsona batek hala eskatuta, eta transferentzia hori bat datorrenean erregistro horren xedearekin.

k) Trasferentziaren helmuga Europar Batasuneko estatu kide bat denean, edo beste estatu bat, baldin eta Europako Erkidegoen Batzordeak, bere eskumenak egikaritzean, adierazi badu estatu horrek babes-maila egokia bermatzen duela.

1. Datuak Babesteko Agentzia zuzenbide publikoko erakundea da, berezko nortasun juridikoa eta gaitasun publiko zein pribatu osoa duena, eta bere eginkizunak gauzatzean independentzia osoaz jarduten duena Administrazio Publikoei dagokienez. Lege honetan eta Gobernuak onetsiko duen estatutu propio batean ezarritakoaren arabera arautuko da.

2. Datuak Babesteko Agentziak eginkizun publikoak gauzatzean, lege honek eta hori garatzen duten xedapenek ezarri gabeko aldeetan, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen arabera jardungo du. Ondare-eskuratze eta kontratazioetan Datuak Babesteko Agentzia zuzenbide pribatuaren mende izango da.

3. Datuak Babesteko Agentzia osatzen duten organoen eta zerbitzuen lanpostuak beteko dituzte Administrazio Publikoetako funtzionarioek eta horretarako kontratatutako pertsonek, lanpostu bakoitzari eratxikitako eginkizunen izaera kontuan hartuta. Langile horiek euren eginkizunak gauzatzean ezagutzen dituzten izaera pertsonaleko datuak isilpean gordetzeko betebeharra dute.

4. Datuak Babesteko Agentziak ondoko ondasun eta ekonomia-baliabide hauek izango ditu, bere xedeak betetzeko:

a) Estatuko Aurrekontu Orokorretan urtero esleitutako diru-kopuruak.

b) Agentziaren ondarea osatzen duten ondasun eta baloreak, bai eta ondare horren ekoizkin eta errentak ere.

c) Legez eratxiki dakizkiokeenetatik beste edozein.

5. Datuak Babesteko Agentziak urtero egin zein onetsiko du aurrekontuaren aurreproiektua, eta gobernuari igorriko dio hori, Estatuko Aurrekontu Orokorretan modu independentean jaso dadin.

1. Datuak Babesteko Agentziaren zuzendariak Agentzia zuzendu eta ordezkatzen du. Kontseilu aholkularia osatzen dutenen artetik izendatuko da, errege-dekretu bidez, lau urterako.

2. Erabateko independentziaz eta objektibotasunez gauzatuko ditu bere eginkizunak, eta ez da egongo inolako jarraibideren mende. Edozein kasutan ere, zuzendariak kontseilu aholkularia entzun beharko du, kontseilu horrek bere eginkizunak gauzatzean egiten dizkion proposamenei dagokienez.

3. Datuak Babesteko Agentziako zuzendariak kargua utziko du soil-soilik 1. idatz-zatiak aipatu aldia amaitu baino lehenago, berak hala eskatuta edo gobernuak kargutik kentzea erabaki duelako, dagozkion betebeharrak modu larrian ez betetzeagatik, bere eginkizunak gauzatzeko bat-bateko ezgaitasunagatik, bateraezintasunagatik edo doloko delituaren ondoriozko kondenagatik. Aldez aurretik espedientea egingo da, eta espediente horretan nahitaez entzungo da kontseilu aholkulariaren osterantzeko kideek esan beharrekoa.

4. Datuak Babesteko Agentziako zuzendaria goi-kargua izango da eta zerbitzu berezien egoeran geratuko da aurretiaz funtzio publikoan aritu bada. Orobat, kargua betetzeko karrera judizialeko zein fiskaleko kideren bat izendatzen bada, zerbitzu berezien administrazio-egoerara igaroko da.

1. Datuak Babesteko Agentziaren eginkizunak dira:

a) Datuak babesteko legeria betetzen dela jagotea eta legeria horren aplikazioa kontrolatzea, bereziki datuen gaineko informazioa jasotzeko, datuetan sartzeko, datuak zuzentzeko, datuen aurka egiteko eta datuak ezerezteko eskubideei dagokienez.

b) Legean edo horren erregelamendu-xedapenetan ezarritako baimenak ematea.

c) Hala denean, eta beste organo batzuen eskumenei kalterik egin gabe, jarraibideak ematea, tratamenduak lege honen printzipioetara egokitzeko.

d) Pertsona ukituek aurkeztutako eskabide eta erreklamazioei erantzutea.

e) Pertsonei informazioa ematea, izaera pertsonaleko datuak tratatzearen inguruko gaian dituzten eskubideei buruz.

f) Tratamenduen arduradun eta eragileei, aldez aurretik horiek esan beharrekoa entzunda, beharrezko neurriak har ditzaten eskatzea, datuen tratamendua lege honen xedapenetara egokitzeko eta, hala denean, tratamenduak bertan behera utz dezaten eta fitxategiak ezerez ditzaten agintzea, horiek lege honen xedapenekin bat ez datozenean.

g) Zehatzeko ahalmena egikaritzea lege honen VII. tituluan jasotakoaren arabera.

h) Aginduzko izaerarekin informatzea lege hau garatzen duten xedapen orokorren proiektuak.

i) Fitxategien arduradunengandik behar besteko laguntza eta informazioa lortzea, euren eginkizunak gauzatzeko.

j) Izaera pertsonaleko datuen fitxategiak egon badaudela iragartzen dela jagotea. Horretarako, aldian-aldian argitaratuko du halako fitxategien zerrenda, Agentziako zuzendariak zehaztutako informazio gehigarriarekin.

k) Urteko oroitidazkia idaztea eta Justiziako Ministeriora bidaltzea.

l) Datuen mugimendua nazioartean kontrolatzea eta horren inguruan bidezkoak diren baimenak ematea, bai eta izaera pertsonaleko datuak babesteko gaian nazioarteko lankidetza-eginkizunak gauzatzea ere.

m) Estatistika-funtzio Publikoaren Legeak estatistika-datuak biltzeari eta estatistika-sekretuari dagokienez ezarri xedapenak betetzen direla jagotea, eta beharrezko jarraibideak ematea, estatistika-xedeekin bakarrik eratutako fitxategien segurtasun-baldintzei buruzko irizpenak ematea eta 46. artikuluak aipatu ahalmena egikaritzea.

n) Lege- zein erregelamendu-xedapenek eratxikitako beste eginkizun guztiak.

2. Datuak Babesteko Espainiako Agentziaren ebazpenak argitaratuko dira interesdunei jakinarazi eta gero. Argitalpena, batez ere, bide informatiko eta telematikoak erabilita egingo da. Erregelamendu bidez ezar daiteke aipatu ebazpenak zer-nola argitaratuko diren. Aurreko paragrafoetan jasotakoa ez zaie aplikatuko fitxategi edo tratamendu bat Datuak Babesteko Erregistro Nagusian inskribatzearen inguruko ebazpenei, ezta lege organiko honen 32. artikuluan araututako kode-ereduak Erregistro horretan inskribatzearen inguruko ebazpenei ere.

1. Kontseilu Aholkulariak aholkuak emango dizkio Datuak Babesteko Agentziako zuzendariari. Kontseilu hori hurrengo kide hauek osatuko dute:

Diputatuen Kongresuak izendatutako diputatu batek.

Senatuak izendatutako senatari batek.

Gobernuak izendatuko duen administrazio zentraleko ordezkari batek.

Espainiako Probintzien eta Udalerrien Federazioak proposatutako toki-administrazioko ordezkari batek.

Historiako Errege Akademiaren kide batek, Akademia horrek proposatuta.

Gaian aditu den pertsona batek, Unibertsitateetako Kontseilu Nagusiak proposatuta.

Erregelamendu bidez ezarritakoaren arabera hautatuko den erabiltzaile eta kontsumitzaileen ordezkari batek.

Datuak babesteko agentzia sortu duen autonomia-erkidego bakoitzeko ordezkari batek, kasuan kasuko autonomia-erkidegoak ezarritako prozeduraren arabera proposatuta.

Fitxategi pribatuen sektoreko ordezkari batek. Ordezkari hori proposatzeko erregelamendu bidez arautuko den prozedura hartuko da kontuan.

Kontseilu Aholkulariaren jardunbidea horretarako ezarriko diren erregelamenduek arautuko dute.

1. Datuak Babesteko Erregistro Nagusia Datuak Babesteko Agentziara bildutako organoa da.

2. Datuak Babesteko Erregistro Nagusian inskribatuko dira:

a) Administrazio Publikoaren titulartasunpekoak diren fitxategiak.

b) Titulartasun pribatuko fitxategiak.

c) Lege honek aipatzen dituen baimenak.

d) Lege honen 32. artikuluak aipatzen dituen kode-ereduak.

e) Datuen gaineko informazioa jasotzeko, datuetan sartzeko, datuak zuzentzeko, datuak ezerezteko eta datuen aurka egiteko eskubideak egikaritzeko beharrezkoak diren fitxategien inguruko datuak.

3. Erregelamendu bidez arautuko dira titulartasun publikoko zein pribatuko fitxategiak Datuak Babesteko Erregistro Nagusian inskribatzeko prozedura, inskripzioaren edukia, inskripzioa eraldatzea, inskripzioa ezereztea, kasuan kasuko ebazpenen aurkako erreklamazio eta errekurtsoak, eta gainerako inguruabarrak.

1. Kontrol-agintariek lege honek aipatutako fitxategiak ikuska ditzake, xede horietarako behar dituzten informazioak bilduta. Ondore horretarako, agiriak eta datuak erakustea edo bidaltzea eska dezakete; agiri eta datu horiek azter ditzakete halakoak gordailututa dauden tokian; eta datuak tratatzeko erabilitako ekipo fisiko zein logikoak ikuska ditzakete, halakoak instalatuta dauden lokaletan sartuta.

2. Aurreko idatz-zatiak aipatu ikuskatzea egiten duten funtzionarioak agintari publikoak izango dira euren eginkizunak gauzatzean. Eginkizun horiek gauzatzean ezagutzen dituzten informazioak isilpean gordetzeko betebeharra izango dute, baita eginkizun horiek gauzatzeari utzi ondoren ere.

1. Lege honen 37. artikuluan —artikulu horretako j), k) eta l) idatz-zatiak eta, datuen nazioarteko transferentziei dagokienez, f) eta g) idatz-zatiak izan ezik— eta 46 eta 49. artikuluetan araututako Datuak Babesteko Agentziaren eginkizunak autonomia-erkidegoek eta horren lurralde-esparruko toki-administrazioek sortu edo kudeatutako izaera pertsonaleko datuen fitxategien gainekoak direnean, euren eskumenen esparruan, autonomia-erkidego bakoitzeko organoek beteko dituzte eginkizun horiek. Organo horiek kontrol-agintariak izango dira eta organo horiei euren eginkizunak betetzean erabateko independentzia eta objektibotasuna bermatuko zaie.

2. Autonomia-erkidegoek euren fitxategien erregistroak sor ditzakete eta horiei eutsi diezaiekete, erregistro horien inguruan aitortu zaizkien eskumenak egikaritzeko.

3. Datuak Babesteko Agentziako zuzendariak ohikotasunez egin diezaieke deialdia autonomia-erkidegoetako kasuan kasuko organoei, erakundeen arteko lankidetzan aritzeko eta jardute-irizpide zein -prozedurak koordinatzeko. Datuak Babesteko Agentziako zuzendariak eta autonomia-erkidegoetako kasuan kasuko organoek elkarri eska diezaiokete euren eginkizunak betetzeko behar duten informazioa.

1. Datuak Babesteko Agentziako zuzendariak jakin badakienean autonomia-erkidegoetako fitxategi jakin bati eustea edo fitxategi horren erabilera lege honen manuren baten aurka doala, lege honen eskumen esklusiboko gai batean, zuzendariak kasuan kasuko administrazioari agin diezaioke horren inguruan zehaztutako neurri zuzentzaileak hartzea agindeian esanbidez ezarritako epean.

2. Kasuan kasuko Administrazio Publikoak ez badu egindako agindeia betetzen, Datuak Babesteko Agentziako zuzendariak Administrazio horrek emandako ebazpena aurkara dezake.

1. Fitxategien arduradunak eta tratamendu-eragileak lege honetan ezarritako araubide zehatzailearen mende egongo dira.

2. Administrazio Publikoak arduradun diren fitxategien kasuan, 46. artikuluko 2. idatz-zatian ezarritakoa hartuko da kontuan, prozedurari eta zehapenei dagokienez.

1. Arau-hausteak arin, astun edo oso astun gisa kalifikatuko dira.

2. Arau-hauste arinak dira:

a) Formazko arrazoiak direla bide, tratamenduaren objektu diren datuak zuzentzeko edo ezerezteko interesdunak egindako eskabideari jaramonik ez egitea, eskabide hori bidezkoa denean legearen arabera.

b) Datuak Babesteko Agentziak legearen arabera eratxikita dituen eskumenak egikaritzean eskatutako informazioa ez ematea, datuak babestearen inguruan oinarrizkoak ez diren inguruabarrei dagokienez.

c) Izaera pertsonaleko datuen fitxategia Datuak Babesteko Erregistro Nagusian inskribatzea ez eskatzea, horrek arau-hauste astunik ez dakarrenean.

d) Izaera pertsonaleko datuak ukituengandik jasotzea, ukituei lege honen 5. artikuluak aipatutako informaziorik eman gabe.

e) Lege honen 10. artikuluan ezarri sekretu-eginbeharra ez betetzea, horrek arau-hauste astuna dakarrenean izan ezik.

3. Arau-hauste astunak dira:

a) Titulartasun publikoko fitxategiak sortzea edo fitxategi horientzako izaera pertsonaleko datuak biltzen hastea, “Estatuko Aldizkari Ofizialean” edo kasuan kasuko egunkari ofizialean argitaratutako xedapen orokorrak hori baimendu gabe.

b) Titulartasun pribatuko fitxategiak sortzea edo fitxategi horientzako izaera pertsonaleko datuak biltzen hastea, enpresaren edo erakundearen objektu legitimo ez diren xedeetarako.

c) Izaera pertsonaleko datuak biltzea pertsona ukituen esanbidezko adostasunik gabe, adostasun hori nahitaezkoa denean.

d) Izaera pertsonaleko datuak tratatzea edo gerogarrenean erabiltzea lege honetan ezarritako printzipioak eta bermeak urratuta edo lege hau garatzeko erregelamenduek ezarri babes-manuak bete gabe, horrek arau-hauste oso astunik ez dakarrenean.

e) Datuetan sartzeko eta datuen aurka egiteko eskubideak egikaritzea eragoztea edo oztopatzea, eta eskatutako informazioa ez ematea.

f) Zuzenak ez diren izaera pertsonaleko datuei eustea edo datu horien gainean legearen arabera bidezkoak diren zuzenketak edo ezerezteak ez egitea, lege honek babestutako pertsonen eskubideak ukitzen direnean.

g) Arau-hauste administratibo eta penalak egitearen inguruko datuak, Herri Ogasunaren datuak, finantza-zerbitzuen datuak eta ondare-kaudimenaren eta kredituaren zerbitzuak ematearen inguruko datu pertsonalak jaso dituzten fitxategietara nahiz norbanakoaren nortasuna aztertzeko adina datu-multzoa duten fitxategietara bildutako izaera pertsonaleko datuak isilpean gordetzeko eginbeharra urratzea.

h) Izaera pertsonaleko datuak dituzten fitxategi, lokal, programa edo ekipoak erregelamendu bidez ezarritako segurtasun-baldintzarik gabe artatzea.

i) Datuak Babesteko Agentziari lege honetan edo hori garatzen duten xedapenetan ezarritako jakinarazpenak ez egitea, eta ondore horietarako jaso behar dituen edo hala eskatzen dituen agiri eta informazio guztiak epean ez ematea.

j) Ikuskatze-eginkizuna gauzatzeari oztopoak jartzea.

k) Izaera pertsonaleko datuen fitxategia Datuak Babesteko Erregistro Nagusian ez inskribatzea, inskripzio hori Datuak Babesteko Agentziako zuzendariak eskatu duenean.

l) Lege honen 5, 28 eta 29. artikuluetan ezarri informazio-eginbeharra ez betetzea, ukitua ez den beste pertsona batengandik jaso direnean datuak.

4. Arau-hauste oso astunak dira:

a) Datuak engainuaren bidez eta iruzurra eginez biltzea.

b) Izaera pertsonaleko datuak komunikatu edo lagatzea, hori onartzen den kasuetatik kanpo.

c) Lege honen 7. artikuluko 2. idatz-zatiak aipatu izaera pertsonaleko datuak bildu eta tratatzea, ukituaren esanbidezko adostasunik ez dagoenean; lege honen 7. artikuluko 3. idatz-zatian aipatutako datuak bildu eta tratatzea, legeren batek hori xedatu ez duenean edo ukituak hori ez duenean esanbidez onartu, edo lege honen 7. artikuluko 4. idatz-zatian jasotako debekua urratzea.

d) Izaera pertsonaleko datuen tratamendua zilegi ez den moduan erabiltzeari ez uztea, Datuak Babesteko Agentziako zuzendariak edo datuetan sartzeko eskubidearen titularrek erabilera hori uztea eskatu dutenean.

e) Tratamenduaren objektu izan diren edo tratamenduaren objektu izateko bildu diren izaera pertsonaleko datuak aldi baterako zein behin betiko transferitzea, horrenbesteko babesik eskaintzen ez duten herrialdeetara, Datuak Babesteko Agentziako zuzendariaren baimenik gabe.

f) Izaera pertsonaleko datuak zilegi ez den moduan tratatzea edo datu horiei aplikatu behar zaizkien printzipio eta bermeak gutxiestea, horrekin oinarrizko eskubideak egikaritzea eragotzi edo oinarrizko eskubideak egikaritzearen aurka egiten denean.

g) Lege honen 7. artikuluko 2 eta 3. idatz-zatiek aipatu izaera pertsonaleko datuak eta pertsona ukituen adostasunik gabe polizia-xedeetarako bildutako datuak isilpean gordetzeko eginbeharra urratzea.

h) Datuetan sartzeko, datuak zuzentzeko, datuak ezerezteko edo datuen aurka egiteko eskubideak kontuan ez hartzea edo behin eta berriro oztopatzea eskubide horiek egikaritzea.

i) Izaera pertsonaleko datuak fitxategi batera bildu izana jakinarazteko legezko eginbeharra behin eta berriro ez betetzea.

1. Arau-hauste arinak 601,01 eurotik 60.101,21 eurorainoko isunarekin zehatuko dira.

2. Arau-hauste astunak 60.101,21 eurotik 300.506,05 eurorainoko isunarekin zehatuko dira.

3. Arau-hauste oso astunak 300.506,05 eurotik 601.012,10 eurorainoko isunarekin zehatuko dira.

4. Zehapenen zenbatekoa mailakatuko da aintzat hartuta ukitutako eskubide pertsonalen izaera, egindako tratamendu-kopurua, lortutako onurak, asmokotasuna, berrerortzea, interesdun eta hirugarrenei eragindako kalte-galerak, eta jardun arau-hauslearen zuzenbidekontrakotasun- eta erruduntasun-gradua zehazteko garrantzitsua den beste edozein inguruabar.

5. Kasuan kasuko inguruabarren arabera, egotziaren erruduntasuna edo egitatearen zuzenbidekontrakotasuna nabarmen gutxitu dela antzemanez gero, organo zehatzaileak zehapenaren zenbatekoa ezarriko du kasuaren araberako arau-haustea zein eskalatara bildu eta astuntasun gutxiagoko arau-hauste motaren eskala aplikatuta.

6. Zehatu nahi den arau-haustea zein arau-hauste motatara bildu eta inola ere ezin izango da ezarri arau-hauste mota horrentzat ezarritako zehapena baino astunagorik.

7. Gobernuak aldian-aldian eguneratuko du zehapenen zenbatekoa, prezioen indizeek dituzten aldaketen arabera.

1. Lege honen 44. artikuluak aipatu arau-hausteak Administrazio Publikoen ardurapeko fitxategietan egin badira, Datuak Babesteko Agentziako zuzendariak ebazpena emango du, arau-haustearen ondoreak geldiarazteko edo zuzentzeko bidezkoak diren neurriak hartzea ezarriz. Ebazpen hori jakinaraziko zaie fitxategiaren arduradunari, hierarkian gorago dagoen organoari eta, halakorik egonez gero, ukituei ere.

2. Agentziako zuzendariak proposa dezake, berebat, diziplinako jardunak hastea, halakoak bidezkoak izanez gero. Aplikatu beharreko prozedura eta zehapenak izango dira Administrazio Publikoen diziplina-araubideari buruzko legerian ezarritakoak.

3. Agentziari komunikatu beharko zaizkio aurreko idatz-zatiek aipatu neurrien eta jardunen inguruan emandako ebazpenak.

4. Agentziako zuzendariak herri-defentsariari komunikatuko dizkio aurreko idatz-zatien babespean egiten dituen jardunak eta ematen dituen ebazpenak.

1. Arau-hauste oso astunak hiru urtera preskribatuko dira, astunak bi urtera eta arinak urtebetera.

2. Preskripzio-epea zenbatzen hasiko da arau-haustea egin den egunetik.

3. Prozedura zehatzailearen hasierak geldiarazi egingo du preskripzioa, baldin eta interesdunak prozedura hasi dela badaki. Preskipzio-epea berriro zenbatzen hasiko da, prozedura zehatzailea sei hilabetez geldi badago, ustezko arau-hausleari egotzi ezin zaion arrazoiaren ondorioz.

4. Falta oso astunen ondorioz ezarritako zehapenak hiru urtera preskribatuko dira, falta astunen ondorioz ezarritakoak bi urtera, eta falta arinen ondorioz ezarritakoak urtebetera.

5. Zehapenen preskripzio-epea zenbatzen hasiko da zehapena ezartzen duen ebazpena irmo bihurtu eta hurrengo egunetik aurrera.

6. Preskripzioa geldiarazi egingo da betearazpen-prozedura hasi eta interesdunak hori jakin badaki. Epea sei hilabete baino gehiagoz geldi badago, arau-hausleari egotzi ezin zaion arrazoiaren ondorioz, berriro oso-osorik igaro beharko da.

1. Erregelamendu bidez ezarriko da titulu honek aipatu arau-hausteak zehazteko eta zehapenak ezartzeko prozedura.

2. Datuak Babesteko Agentziaren edo kasuan kasuko autonomia-erkidegoko organoaren ebazpenek amaitu egiten dute administrazio-bidea.

Lege honek edo beste lege batzuek eratxikitako ahalmenak egikaritzean, azaroaren 3ko 32/2003 Telekomunikazioen Lege Orokorraren arau-hausteen inguruko ahalmenak kenduta, Datuak Babesteko Espainiako Agentziak gauzatutako prozedura zehatzaileek gehienez sei aste iraungo dute.

Izaera pertsonaleko datuak modu ez zilegian erabili eta lagatzeak arau-hauste oso astuna dakarrenean, Konstituzioak eta legeek bermatu dituzten herritarren eskubideak egikaritzea eta nortasuna askatasunez garatzea modu larrian eragozteagatik edo horien aurka modu larrian egiteagatik, Datuak Babesteko Agentziaren zuzendariak zehatzeko ahalmena egikaritzeaz gain, izaera pertsonaleko datuen fitxategietako arduradunei agin diezaieke datuak zilegi ez den moduan erabiltzeari edo lagatzeari uztea, fitxategiak titulartasun publikokoak zein pribatukoak izan. Agindeiari jaramonik egiten ez bazaio, Datuak Babesteko Agentziak, arrazoitutako ebazpenaren bidez, fitxategi horiek geraraz ditzake, pertsona ukituen eskubideak berrezartzeko.

Automatizatutako fitxategi edo tratamenduak, Datuak Babesteko Erregistro Nagusian inskribatuta egon ala ez, lege organiko honetara egokitu beharko dira hiru urteko epean, lege organiko hau indarrean jarri zenetik zenbatzen hasita. Epe horretan, titulartasun pribatuko fitxategiak Datuak Babesteko Agentziari komunikatu beharko zaizkio, eta titulartasun publikoko fitxategien arduradun diren Administrazio Publikoek fitxategia arautzeko xedapen egokia onetsi beharko dute, edo aurretik zegoena egokitu.

Automatizatu gabeko fitxategi eta tratamenduen kasuan, aurreko lerrokadan ezarri lege organiko honetara egokitzea eta betebeharra hamabi urteko epean gauzatu beharko dira, 1995eko urriaren 24tik zenbatzen hasita, ukituek datuetan sartzeko, datuak zuzentzeko eta datuak ezerezteko dituzten eskubideei kalterik egin gabe.

1. Estatuaren Administrazio Orokorrak eta autonomia-erkidegoetako administrazioek, interesdunaren adostasunik gabe, Estatistikako Institutu Nazionalari eska diezaiokete, euren eskumenak egikaritzen dituzten lurraldeetako biztanleen udal-erroldetan eta hauteskunde-erroldan jasotako izen, abizen, bizileku, sexu eta jaiotza-dataren inguruko datuekin osatutako fitxategiaren kopia eguneratua, populazioaren fitxategi edo erregistroak sortzeko.

2. Populazioaren fitxategi eta erregistroen xedea izango da Administrazio Publiko bakoitzaren organoak eta kasuan kasuko lurraldeetan bizi diren interesdunak komunikatzea, Administrazio Publiko bakoitzaren eskumenek eratorri harreman juridiko administratiboei dagokienez.

Indargabetutako Alferren eta Gaizkileen Legeen eta Arriskugarritasunaren eta Gizarte-errehabilitazioaren Legeen babesean beren beregi egindako espedienteak ezin izango dira kontsultatu ukituen esanbidezko adostasunik gabe edo espediente horien datatik 50 urte igaro gabe, baldin eta espediente horiek pertsonen segurtasuna, ohorea, intimitatea edo irudia ukitzeko moduko edozein datu jasotzen badute. Espedienteen datatik 50 urte igaro ez badira, Estatuko Administrazio Orokorrak eskatzailearen esku utziko ditu agiriak, salbu eta gauza jakina denean ukituak hilda daudela, eta agiri horietatik aurreko lerrokadan aipatu datuak kenduko ditu, kasu bakoitzean egoki diren prozedura teknikoak erabilita.

Tributuen Lege Orokorraren 112. artikuluko laugarren idatz-zatiak aurrerantzean hurrengo idazketa hau izango du:

“4. Lege honen 111. artikuluan, artikulu honen aurreko idatz-zatietan edo lege lerruneko beste edozein arautan ezarritakoaren arabera tratamenduaren objektu diren izaera pertsonaleko datuen gainean tributu-administrazioari egin beharreko lagapenak ez du behar izango ukituaren adostasunik. Halaber, esparru honetan ez da aplikatuko Izaera Pertsonaleko Datuak Babesteko Lege Organikoaren 21. artikuluko 1. idatz-zatiak ezarritakoa Administrazio Publikoei dagokienez”.

Lege organiko honetan ezarritakoak ez die kalterik egingo herri-defentsariaren eta autonomia-erkidegoetako antzeko organoen eskumenei.

Eraldatu egiten da Aseguru Pribatuak Antolatu eta Gainbegiratzeko azaroaren 8ko 30/1995 Legearen 24.3 artikuluko 2. paragrafoa. Aurrerantzean ondoko idazketa hau izango du:

“Aseguru-erakundeek ezbeharrak likidatzeko eta lankidetza estatistiko eta aktuarialerako izaera pertsonaleko datuak dituzten fitxategi erkideak ezar ditzakete, arriskuen tarifazio zein hautaketa eta aseguru-teknikako ikerketak egitea ahalbidetzeko. Aipatutako fitxategi horiei datuak lagatzeko ez da behar izango ukituaren aurretiazko adostasunik, baina ukituari komunikatu beharko zaio bere datu pertsonalak fitxategi erkideei laga dakizkiekela aipatu xedeetarako. Kasu horretan, esanbidez aipatuko da nor den arduraduna, legean ezarri datuetan sartzeko, datuak zuzentzeko eta datuak ezerezteko eskubideak egikari ahal izateko. Era berean, ukituaren adostasunik gabe, fitxategi erkideak ezar daitezke aseguruan egon daitekeen iruzurra prebenitzeko. Hala ere, halako kasuetan, ukituari nahitaez komunikatu beharko zaio, ukituaren datuak lehendabiziko aldiz sartzen direnean, fitxategiaren arduraduna nor den eta datuetan sartzeko, datuak zuzentzeko eta datuak ezerezteko eskubideak egikaritzeko moduak zein diren. Edozein kasutan ere, osasunaren inguruko datuak ukituaren adostasunarekin bakarrik trata daitezke”.

Datuak Babesteko Agentzia izango da izaera pertsonaleko datuen tratamenduaren inguruan pertsona fisikoak babesteko erakunde eskuduna, Espainia alderdi den nazioarteko edozein hitzarmenek ezarritako tratamenduei dagokienez, baldin eta halako hitzarmenek kontrol-agintaritza nazional bati eratxiki badiote eskumen hori. Horrela izango da hitzarmen horiek garatzearen ondorioz eginkizun horretarako beste agintaritzaren bat sortzen ez den bitartean.

Erregelamendu bidez garatuko dira promozio-errolda sortzeko, errolda horretan agertzeari uko egiteko, errolda eskatzaileen esku uzteko eta zabaldutako zerrendak kontrolatzeko prozedurak. Erregelamenduak ezarriko ditu promozio-errolda jardunbidean hasteko epeak.

Lege honen Azken Xedapenetatik Lehenengoak ezarritakoa gauzatu arte, indarrean izango dira, dagokien lerrunarekin, aurretik zeuden erregelamenduak eta, bereziki, martxoaren 26ko 428/1993, ekainaren 20ko 1332/1994 eta ekainaren 11ko 994/1999 errede-dekretuak, lege honen aurka ez doazen neurrian.

Indargabetua geratzen da izaera pertsonaleko datuen tratamendu automatizatua arautzeko urriaren 29ko 5/1992 Lege Organikoa.