33/2002 FORU LEGEA, AZAROAREN 28KOA, EMAKUMEEN ETA GIZONEN AUKERA BERDINTASUNA SUSTATZEKOA.

(2002ko 150. NAOn argitaratua, abenduaren 13an)

1. artikulua.Helburuak eta neurriak sentsibilizazioaren arloan.

1. Sentsibilizazioaren arloan, Nafarroako Gobernuaren eta haren menpeko erakunde eta entitateen helburuak hauexek dira:

a) Administrazioaren maila guztietan, politikarien nola funtzionarioen artean, sentsibilizazioa generoko berdintasunaren gaietan.

b) Nafarroako gizartearen sentsibilizazioa generoko berdintasunaren gaietan.

c) Generoaren ikuspegia txertatzea administrazioaren jarduketa guztietan.

d) Nafarroako antolamendu juridikoa egokitzea gizon eta emakumeen arteko berdintasunaren arloan nazioartean dauden araudietara.

e) Ikerketa eta zabalkundea, berdintasunaren gaietan dagoen legeria eta jurisprudentziarena.

2. Helburu horiek erdiesteko neurri hauek gauzatuko dira:

a) Administrazioko langile guztientzako genero berdintasunari eta praktika zuzenei buruzko ikastaroak, jardunaldiak eta mintegiak programatzea.

b) Administrazioko dokumentuen azterketa, bertatik eta Nafarroako legedi indardunetik hizkera sexista ezabatzeko.

c) Neurriak hartzea administrazioek egiten dituzten azterlan, argitalpen eta publizitatean hizkeraren erabileran bazterkeriarik ager ez dadin, administrazio hizkeraren erabilera sexista ez izateko orientabideak emanen dituzten materialak prestatu eta zabaltzea, administrazioaren argitalpenetako estilo batasuna erraztu eta bermatzeko.

d) Funtzio publikoan sartzeko baremoei generoko berdintasunari buruzko ikastaroak gehituko zaizkie.

e) Administrazioak zerbitzu publikoak betetzeko enpresen kontratazioetako lehiaketen baremoei enpresa horiek generoaren arloan praktikak zuzenak izatea gehituko zaie.

f) Nafarroako udaletan emakumearen zinegotzigoak sortzea eta genero berdintasunaren aldeko jarduerak betetzea sustatuko da, kanpaina eta bestelako baliabideak erabiliz, Nafarroako Udal eta Kontzejuen Federazioarekin elkarlanean.

g) Urtero, Nafarroako aurrekontu orokorretan, behar adina diru aurreikusiko da foru lege hau betetzeko garatzen diren neurriak gauzatzeko.

h) Nafarroako antolamendu juridikoaren azterketa, aldaketak egiteko gizon eta emakumeen arteko aukera berdintasunaren gaiei buruz Europako Batasunak emaniko zuzentarauen eta nazioarteko komunitateak emaniko arauen arabera.

i) Emakumeengan eragina duten arauen aldizkako jarraipena eginen da, Foru Komunitateko auzitegiek horren inguruan emaniko epaiak aztertuz. Komunikabideetan eta bestelako toki publiko eta pribatuetan etengabeko kontzientziazio kanpainak eginen dira.

j) Genero berdintasunaren aldeko elkarteak bultzatuko dira eta arlo horretan aritzen diren elkarteei sostengua, ekonomikoa zein bestelakoa, emanen zaie.

k) Foru lege hau garatzeko lanetan generoko gaietan aritzen diren elkarteak inplikatuko dira, bereziki Nafarroako Emakumearen Institutuan ordezkaritza dutenak.

l) Gizonen eta emakumeen aukera berdintasunean eragiten duten alderdiei buruzko azterlanak eginen dira, gizartearen kontzientziaziorako erabakien eta jarduketen oinarri izan daitezen.

m) Aukera berdintasunerako eragile eta sustatzaileen prestakuntza sustatuko da, lan, hezkuntza, kultura eta beste arlo batzuetan ekintza positiboak gauzatzeko.

2. artikulua.Helburuak eta neurriak gizarte eta politikako partaidetzaren arloan.

Gizarte eta politikako partaidetzaren arloan, Nafarroako Gobernuaren eta haren menpeko organo eta entitateen helburua izanen da emakumeen parte hartzea sustatu eta areagotzea bizitza politikoan eta gizartean.

Aurreko xedea lortzeko honako neurri hauek erabiliko dira:

a) Gizonen eta emakumeen parte-hartze sozial berdina helburu gisa duten emakumeen elkarteak, edozein motatakoak, sustatzeko kanpainak eginen dira. Neurri honetan, oso kontuan hartuko dira emakumeen elkarte gutxi dauden Nafarroako aldeak.

b) Emakumeen eta gizonen presentzia entitate edo elkarteetako organo erabakitzaile eta betearazleetan berdintasunezkoa izatearen alde eginen da, kanpainen bitartez.

c) Emakumeen presentzia alderdi politikoetako organo erabakitzaile eta betearazleetan berdintasunezkoa izatea sustatuko da eta, halaber, hauteskundeetarako horiek aurkeztutako hautagai zerrendetan ere, eta hautagai zerrendetan emakumeen presentzia handitzen duten indar politikoei.

d) Komunikabideetan kanpainak programatuko dituzte, gizarte osoari zuzenduak, emakumeek gizartean eta politikan parte hartzearen garrantziaz eta beharraz.